( منحة عيد الأضحى المبارك ) بقلم الشاعر && شعر/ حمودة سعيد محمود الشهير بحمودة المطيرى
- ( منحة عيد الأضحى المبارك )
- قالوا وزيرك جاب لك منحة .......عيد الأضحى قلت يعيش
- رحت إدارة قوص وانا بارقص تقولش ساعتها شربت حشيش
- فجأة بابص ورايا لقيت............. عسكرى نازل فيا تلطيش
- ضربة تسيبنى وضربة تصيبنى وضربة تخلى العظم دشيش
- رحت موطى فى ودنه قايل له سيبنى يا باشا وخد بقشيش
- فجأة لقيته أتغير خالص تشوفه تقول على طول درويش
- قلت غلطت يا سيدنا الشيخ أنا مستغنى عن الكلابيش
- وأعدك أنى أخيط خشمى .........ولا أحتك بأى شاويش
- ويا ريت تعاملنى كأنى صغنن ولسه ما خدر فيا الريش
- وأنا باتكلم لسه معاه ...........فجأة أخدنى على التفييش
- مالى بابص شمال فى يمين شفت خلايق عقل مافيش
- دخلت فى وسط الصف أنادى وزيرى ارحمنى بلقمة عيش
- فجأة لقيت الناس بتدوسنى ...... وأنا تحتيهم زى الخيش
- قمت ألملم عظمى الضايع وابنى فى نفسى من التناتيش
- لساك بابنى وابص قصادى شفت رجال لابسين طرابيش
- وشد قفايا واحد منهم .............وزحنى بسرعة على التفتيش
- دخلت وروحى وكفنى فى يدى مين بيروح عش الخفافيش
- طلعت أهلوس دون ما أنا دارى وزيرى حبيبي كفاية تطنيش
- هو عشانك آكل زيك .................لحمة وفتة وجنة قريش
- تحرق دمى وتكتم همى ......... وتلفق لى قرش حشيش
- هو أنل ناقص تانى مصايب ده حاجة تخلى العقل يطيش
- شعر/ حمودة سعيد محمود
- الشهير بحمودة المطيرى
ليست هناك تعليقات:
إرسال تعليق